政情：嫻姐KK夾攻林鄭變拉票機器
工聯會前日起一連三日宴請獨居長者食團年飯，多位高官輪流出席，身兼榮譽會長嘅立法會議員陳婉嫻同黃國健（KK）尋日更連立法會大會都唔開，走去酒樓撐住個場，皆因難得請到政務司司長林鄭月娥接力捧場，嫻姐同KK一於食得唔好嘥，全程捉住林鄭滿場飛，當正林鄭係工聯會拉票機器！
公務繁忙嘅林鄭原本打算現一現身，致辭後飲啖水就趕返金鐘開會，但坐喺隔籬嘅嫻姐就力勸林鄭一場嚟到，應該畀面班長者食完乳豬頭盤先好走。用到「長者」壓落嚟，平日出名細食嘅林鄭騎虎難下惟有頂硬上，諗住快快手夾兩件乳豬食完就起身走人。
同全場長者傾偈
不過，嫻姐同KK趁林鄭食完乳豬就一人一邊左右夾攻，要求原本已經趕到甩轆嘅林鄭，同在場冇一千都有幾百個長者傾吓偈，林鄭亦再次屈服，逐枱同公公婆婆傾偈握手，氹得公公婆婆笑到見牙唔見眼，更大讚林鄭真人又靚又瘦，爭在未攬住佢嚟錫啫。今次工聯會將林鄭用到咁盡，肯定冧得班公公婆婆好開心，難為趕住返去開會嘅林鄭遲大到！