中環出更：孫穎助「小鄧麗君」秘密練歌
蜚聲樂壇嘅「琵琶公主」孫穎桃李滿門，其中年前收嘅徒弟「小鄧麗君」侯小媛，就一直被鄧麗君嘅粉絲窮追不捨，嚇得小媛不知所措外，就連嚟緊開個人演唱會嘅練歌，孫穎都要「收埋」佢喺沙田豪宅秘密進行。孫穎話，有班印尼粉絲最神通廣大：「小媛去到邊，佢哋就追到邊，追足三年。」有男歌迷更瘋狂，每天狂發逾百短訊追求，嚇得小媛急急換號碼。
卓妮問小媛有冇拍拖，佢就擰擰頭，話媽咪從小管得好嚴，唔准男生致電家中。反而孫穎替徒弟着急，希望小媛盡快拍拖，話唱情歌一定更有味道喎。小媛父母都係音樂人，從小耳濡目染下能歌善舞，當師範學院畢業後，佢立志做音樂老師，直到一○年參加「尋找鄧麗君的傳人全球選拔大賽」奪冠，一夜成名。
對徒弟要求高
如今小媛上台表演已有鄧麗君嘅淡定台風，但回想出道之初，孫穎覺得佢表現太嫩，於是找來鋼琴大師劉詩昆特訓小媛，要求她每個音符都要唱得準，可謂「嚴師出高徒」。此外，孫穎都帶徒弟巡迴上海、北京、河南等多個省市演出，讓她真實地感受舞台，表演漸趨成熟。