中環出更：盧偉國多「樂」事
工程界立法會議員盧偉國（WK）予人印象嚴肅古板，但原來佢私底下係個音樂發燒友，精通大部分中西樂器。WK嘅音樂生涯可以追溯至五十年前，當時佢住喺九龍城福佬村道唐樓，有次同鄰居去天台踢波，見到大哥哥大姐姐喺度吹口琴，於是就同其他小朋友圍埋一齊邊聽邊學，自此與樂器結緣。
直到中五嗰年，WK去戲院睇《甲午風雲》，對琵琶彈奏《十面埋伏》一幕念念不忘，於是喺會考後隨即報名學琵琶，只係學咗三個月，老師話佢已經學識晒琵琶嘅基本功，可以自行返屋企練習。到大學畢業當上工程師後，WK又喺偶然機會下向粵曲老師王粵生拜師學藝，學習粵曲南音演唱同拍和，後來又覓得一把清代仲尼式「天籟靈機」古琴，確係如虎添翼。
雖然琵琶音色清脆俐落，表演力豐富，但WK就覺得古琴最沉厚同最有韻味，又話古代文人士大夫當正古琴係自己嘅命根，發生火燭時會先抱走古琴，令唔少珍貴嘅古琴可以流傳至今。依家WK收藏咗十幾把古琴，但佢最鍾意嘅都係「天籟靈機」，又話呢把古琴係無價寶，「除非有好特別嘅理由，否則我都唔會賣。」
家人亦是歌唱家音樂人
其實WK全家同音樂都好有緣分，佢太太同囝囝分別係男女高音歌唱家，主要唱意大利歌劇，太太近年亦跟佢學唱粵曲。唔單止咁，WK嘅細佬係著名音樂人盧偉華，早年曾經去美國深造，間中都有幫WK作吓曲。WK又話，屋企書房有張電腦枱同一張琴枱，當忙完工作後擰轉頭就可以靜心彈琴。
不過，自從入咗立法會後，WK已經好耐冇彈過琴，亦冇乜時間打理珍藏，所以遲啲會發掘吓識玩音樂嘅議員一齊合奏，喺繁忙嘅議會生活尋找樂趣。
卓妮