話咁快下星期就係農曆新年嘞，預先恭祝各位蛇年行蛇運。過年過節當然開心啦，小朋友一諗到有利是逗肯定眉飛色舞。之不過咁，大時大節往往大魚大肉，咁就會產生好多傷腦筋嘅副作用。功夫茶問問大家，一家團圓嘅年夜飯通常會食剩幾多餸菜呢？除咗年夜飯之外，賀年食品又會有幾多變成垃圾？
有政黨組織做過一項調查，結果發現接近八成受訪者曾經棄置存放太耐嘅賀年食品，其中浪費最多嘅食品係年糕。另外，近三成受訪者會將收到嘅利是封當作普通垃圾直接丟棄，只有約百分之二十七將利是封回收。
立法會議員陳克勤就建議嘞，市民無論購買賀年食品定係過節食飯，都應該以適量為原則。陳議員又希望政府喺公共屋邨設立廚餘回收設施，提高社區嘅廚餘回收率，同時亦建議市民循環再用利是封，選購包裝簡約嘅禮品。
簡單咁講，農曆新年又係一個垃圾高峰期，堆填區承受極大嘅壓力。呢一個咁傷腦筋嘅副作用，點樣解決好呢？有人統計過，香港每日平均有三千五百公噸廚餘棄置到各個堆填區，佔都市固體廢物量四成。剛剛出爐嘅施政報告提到，政府推出「惜食香港運動」，期望動員市民同工商業界減少廚餘，另外逐步興建回收有機資源嘅現代化設施，將廚餘轉化成能源同堆肥產品等等。
將廚餘轉化成能源同堆肥產品理論上係可行嘅，好似台灣咁吖，台北市內湖焚化廠利用回收家庭廚餘滲出水，再製造成「有機液體土壤改良劑」，多次用於種植蔬菜花草成果豐碩，北市明倫高中試種番薯碩大飽滿，廠方免費為市民提供呢一種廚餘滲出水。不過咁喎，轉化廚餘始終唔係減少垃圾嘅最佳辦法，正如民間團體話齋，施政報告嘅官方說法雖然冠冕堂皇，但面對每日三千五百公噸廚餘，實在難以一時三刻解決問題，增建廚餘設施亦係治標不治本。
照咁講，點樣先至可以對症下藥呢？民間團體就話嘞，應該立即推行垃圾徵費計劃，就好似寓禁於徵嘅膠袋稅一樣，先至有助提高市民嘅環保意識。
講到垃圾徵費，功夫茶少不免非常擔心。你知啦，港產官僚冇嘢叻，最叻就係好心做壞事，如果日後丟棄垃圾要畀錢，會唔會造成大量非法傾倒廢物o架？萬一政策任意妄為急就章，會唔會帶來擾民嘅反效果o架？特首梁振英話會就垃圾徵費計劃研究研究再研究喎，可能又係「成熟一項推一項」啩。
點都好啦，如果真係實施垃圾徵費，功夫茶懇切呼籲官老爺，必須小心考慮周詳細節，千祈唔好再盲動擾民呀！