政情：廢腑之言：鬍鬚曾放定風咪諗派糖

又估錯數　「應使則使」

鬍鬚曾喺對上一份預算案，就預計本財政年度大致收支平衡，有約三十億元赤字。不過截至去年底，庫房已錄得四百億元盈餘，財政年度仲未完，已經估錯超過十倍。鬍鬚曾自辯話，今個財政年度大豐收，係有近三百八十億元投資收益，賣地多咗，連同印花稅收入，所以有「意外之財」，所以唔覺意估錯咗。

鬍鬚曾喺網誌緊接重申會堅守「應使則使」原則，強調政府開支每年都加，一旦「大花筒」使多咗就會影響投資收入，形成惡性循環，睇嚟今年派糖無望喇。