政情：公民講場：癡人政協夢 貪曾醉無恥

「貪曾」前特首曾蔭權爵士最終無份做全國政協，更加唔好講話做咩政協副主席啦。點知貪曾份人死要面，話北京曾經邀請佢做政協，只係佢自己唔想做，擺出一副「唔係無得撈，而係我唔撈」嘅態度。但究竟中央邊個同佢講、同佢講咗啲乜，都係得貪曾一人喺度自說自話，實情係點樣根本無人知。

其實好可能根本無呢件事，貪曾攬住咁多茅台，一定係佢自斟自飲，飲到似隻醉貓，至幻聽到中央想委任佢做政協。佢無得做國家領導人嘅原因好多，除咗貪盡海陸空畀廉署查，我哋都寫咗佢插手數碼電台嘅事，又有人大聲言如果佢做政協副主席，就會辭職唔做。所以佢話北京有人問過佢做唔做政協，睇怕佢都係飲醉酒幻想出嚟嘅啫。

第一手消息請下載on.cc東方互動iPhone/iPad/Android/Windows Phone Apps