曾被美國權威媒體稱為「當今最天才、最閃亮嘅偶像明星」嘅國際著名鋼琴家郎朗繼上月喺戛納獲得「法蘭西藝術與文學騎士勳章」後，前日再喺柏林獲得第四十八屆德國電視藝術最高榮譽「金相機」獎嘅「年度國際最佳音樂獎」。郎朗喺接過獎項後，親吻個獎座，仲即場演奏一首極具中國風嘅中國曲目《喜洋洋》。呢首曲咁具「中國Style」，當然為在座觀眾帶嚟唔少中國農曆新年嘅氣氛啦！
據了解，設立呢個獎項嘅德國周刊《傾聽》（H"ORZU）仲喺漢堡發表評論：「郎朗不僅是一位傑出的鋼琴家與音樂家，他更能用他極富感染力的藝術風格吸引那些非古典音樂愛好者，並使觀眾陶醉於他的音樂世界中。」
今年三十歲嘅郎朗雖然獲獎無數，但仍然喺佢微博上發布話攞咗呢個獎真係好開心。郎朗○六年通過優才計劃成為香港人，曾經講過話好鍾意香港，但近年長居紐約，佢今次再攞獎，就算唔可以話係香港人嘅光榮，但一定可以話係為中國人爭光嘅。