政情：郭炳江留任上海政協 炳湘之友大感愕然
新一屆政協名單已塵埃落定，除咗貪曾被摒出局，好多資深政協都未獲連任，好似新地非執董郭炳湘咁，雖然只係做咗兩屆全國政協常委，但郭老大行情一早被看淡，所以今屆被極速叮走，佢亦無太大反應，而且回應都相當得體，發出聲明話自己曾任四屆全國政協，當中兩屆出任政協常委，為國家服務感到莫大榮幸，期望將來喺不同崗位，貢獻國家。
同涉新地案 境遇不一
不過事隔三日，郭老大身邊嘅朋友就對郭家大少無得留低感到莫名奇妙，佢嘅朋友話，唔少人都以為今次郭老大被除名，九成九同新地案有關，但「郭老二」郭炳江今屆同樣涉及新地案，又可以連任上海市政協常委，而佢位公子郭基煇更加獲委任為廣東省政協，最費解嘅係，郭炳江畀廉署控告，仲有得留低做上海市政協常委，反而郭炳湘無畀廉署告，只係協助調查就冇得連任，如果用一般邏輯分析根本冇用，認真離奇咁話。
政協名單公布晒，回頭又要睇番好多人關心嘅新地案，郭炳湘將於本月底返廉署報到，到底會被控、繼續保釋定係無條件獲釋，請看下回分解！