政情：立會投資王派蛇年通勝

兩人出晒名係立法會內股壇高手，聽聞唔少議員私底下都會問兩人意見，斬獲相當唔錯。但講到投資哲學，兩人就非常唔同。陳健波係「鬥長命派系」，深信只要有充足資金，到低位溝貨係成功秘訣，而且愈低位愈要守住，千祈唔好被大戶洗倉時震走。佢話呢招用咗三十年，令佢唔少股票都由蝕變贏，佢又話另一秘訣係一定要有貨在手，否則唔會緊張市況走勢。不過前提係手持優質股票，工商銀行、招商銀行等內銀股就係佢心水。

相反張華峰認為玩股票一定要識止蝕，向來唔玩溝貨，深信股票跌得多，即係入錯貨，如果有閒錢溝貨，不如買第二隻好過。至於止賺方面，張華峰認為可以定得大膽進取啲，贏少少就離場根本享受唔到大市升浪，好似佢手持港交所（388）咁，現貨價已經百四蚊，但峰哥死唔肯散貨，話估計今年內有機會衝上二百蚊，到時先放都未遲。

嫌煩宜買金保值

之不過呢，香港人鬼死咁忙，唔係個個都有時間睇實個市，對於一啲唔得閒睇住個市嘅散戶，兩位投資王又有咩心水？陳健波就話恒指來年升勢未必好高，預計都係兩萬六、七點左右，如果嫌煩又唔識睇邊隻好，可以試吓揀盈富基金，因為基金已經包括晒優質藍籌股，盡享大市升勢。至於張華峰就話如果睇唔穿個市，不妨走去買金，因為未來幾年都會持續低息，銀紙不斷貶值，買金仲好過擺錢喺銀行。有時間做功課嘅股民，就可買內地一線礦產股，因為呢類股跌極有譜，佢仲話當年自己第一桶金，就係靠買菲律賓礦產股喎。

不玩認股證孖展

雖然兩人投資哲學唔同，但兩人不謀而合之處，就係不沾手複雜嘅衍生工具，陳健波話自從七十年代試過玩認股證跌到渣都冇之後，從此唔玩呢味嘢。張華峰亦話衍生工具可以扭曲現時股票價值，如果唔係專業投資者，呢啲嘢少掂為妙。仲有一點係兩人縱橫股海多年，都係唔玩孖展，從不借錢炒股，唔知大家聽咗咁多，有冇少少得着呢？