中環出更：燒腩配氣泡酒 別具風味
潮流興食中菜配葡萄酒，原來配上葡萄氣泡酒，都別有一番玩味。早前星級品酒師鄺英志（Peter）與米芝蓮二星酒家行政總廚曾超敬玩Crossover，為星級點心及中菜配襯氣泡酒。當今世界首屈一指嘅靚氣泡酒酒莊集中於德國，Peter最欣賞以德國一百五十年歷史嘅Rotkappchen Rose Trocken，配上五香燒腩肉及叉燒，佢盛讚泡沫幼細、略帶單寧嘅氣泡酒，可以突出肉質嘅燒烤味，令人耳目一新。
Peter啱啱由東北瀋陽返來，事關一向嗜飲高濃度白酒嘅內地人，近年亦跟上世界潮流，流行學飲葡萄酒，Peter係全球華人最高排名嘅品酒師，經常獲邀北上神州去開課分享，自然忙到冇時停。當日佢為唔同嘅菜式配上唔同氣泡酒，由經典點心蝦餃燒賣，到桂花醬杞子水晶肉、龍皇披金甲等得獎菜式，總有一款絕妙配搭。
Peter教路話，靚氣泡酒嘅氣泡幼細度應該拍得住香檳，仲要好似棉花糖咁「棉」。
至於飲氣泡酒嘅秘訣，係淺嘗一啖，將酒留喺口腔中耐啲，細味佢優雅嘅果香味。
咖喱可搭白酒
當日去試酒嘅食家包括新派東南亞菜館行政總廚Marco，佢話愈嚟愈多人鍾意開餐時配葡萄酒，就算係香辣濃味嘅菜式都唔放過，例如咖喱配搭白酒，味道更引人入勝。
卓妮