中環出更：劉吳惠蘭現身AO歌唱比賽
一眾政府高官之中，不少都係唱得之人。香港政務主任協會前日喺中環大會堂音樂廳首次舉辦AO（政務官）歌唱比賽，邀請晒十二局嘅代表參加，唔少新舊AO都現身撐老友，包括久未露面嘅前商務及經濟發展局局長劉吳惠蘭（Rita）同前常秘蔡瑩璧。Rita年前因病辭職專心養病，當日卓妮見佢笑容滿面，相信佢嘅健康已經冇乜大礙。Rita嘅「給力」果然奏效，比賽冠軍最終由商務及經濟發展局奪得。
區璟智出動面具搶鏡
擔任協會主席嘅「AO歌王」民政事務局常秘楊立門好落力，做表演嘉賓又做評判。參賽嘅財經事務及庫務局常秘區璟智同一班同事以「唱錢」搶鏡，一口氣唱咗三首同錢有關嘅歌，仲出動埋面具同道具銀紙，咁有心思，最終雖未能躋身三甲，但都賺到個最佳台風獎。難得有機會聽到一眾AO開金口，一千張入場門票早被搶購一空。公務員事務局常秘黃鴻超同前運輸及房屋局局長鄭汝樺擔任比賽評判，前立法會秘書長馮載祥及前創新科技署署長陳育德就擔大旗演出。
卓妮