今時今日，神州大地無物不假，無物不毒，簡直到咗出神入化嘅地步。內地記者調查賀年食品發現，有地下工場回收酒瓶清洗後直接灌假酒出售，原料係水、色素、酒精、香精等，葡萄酒一滴葡萄汁都冇；而糖果亦唔係糖果，只係用澱粉、糖精、香料合成，奶糖完全不含奶成分，問你服未。呢啲所謂賀年食品，食你唔死算你大命！
不過咁，功夫茶今日想講嘅唔係賀年食品，而係化學豉油。呢種化學豉油就犀利咯，完全不含黃豆成分，只需用化學原料左溝右溝，就可以擺上餐枱，連食神都難辨真假，簡直同頭髮豉油有得揮。
嗱，本報記者日前到有「食材街」之稱嘅廣州一德路食品批發市場，花二百蚊人民幣，就輕易買到製造化學豉油嘅原材料，包括醬油香精、黃原膠、焦糖色素等，足足可以溝出一噸化學豉油。老闆仲沾沾自喜，聲稱化學豉油成本廉宜，製作簡單，幾可亂真，唔止內地食肆採用，香港旺角上海街都有舖頭問佢攞貨，一個電話，即日送貨！
更神奇嘅係，化學豉油唔只色、香、味同真豉油冇乜分別，連老抽都可以溝到。有人可能會問，食咗化學豉油之後會點吖？聽吓學者點講，化學豉油可能含有重金屬，人體吸收後會危害肝臟，若鹽分太多仲會損害腎臟添，即係話隨時食到肝腎都有事，問你驚未！
話時話，蝕本生意冇人做，殺頭生意有人做，內地奸商為咗賺多幾個錢，無所不用其極，攞人命嚟較飛，早就唔係乜嘢新聞，最得人驚嘅係，呢啲化學豉油居然已經暗中殺入香港，港人中咗招都唔知，真係諗起都恐怖。雖然食安中心大派定心丸，聲稱最近兩年檢測過二百二十個豉油樣本，結果都滿意喎。不過大家唔好開心住，事關港產官僚一向後知後覺，渾渾噩噩，經常都要等到出事至補鑊，旨意佢哋把關，不如自求多福好過。
呢，早排致癌食油攻港，搞到人心惶惶，證明當局把關不嚴，漏洞多多。食安中心亡羊補牢，日前抽查市面逾百個食油樣本，結果顯示七十九個樣本含微量苯並（a）芘，七個含微量黃曲霉毒素，雖然當局聲稱全部低於法定標準，但始終令人無法放心。正所謂積少成多，日日食埋呢啲化學物品，積積埋埋就大件事嘅喇。
講到底，食落肚嘅嘢，都係嚴格啲好，尤其係內地無物不毒，香港隨時受到池魚之殃。計功夫茶話齋，如果港產官僚唔想香港淪陷，民以食為天變成民以食為憂，咁就要醒醒定定，好好把關，千祈唔好瞌眼瞓吖！