政情：食剩飯生瘌痢 黑英靠嚇減浪費
天文台前台長林超英（黑英）出晒名係環保達人，除咗奉行夏天唔開冷氣外，平日沖涼亦唔用番梘。黑英尋日出席一個有關推動社區減廢嘅活動時，憶述細個食飯經常被告誡一粒米都唔好食剩，否則大個咗頭髮就會生瘌痢，剩一粒米就生一撻瘌痢咁話！所以佢建議學校用呢個方法教育學生唔好食剩飯，但咁樣似靠嚇多啲囉！
不過，黑英終於遇到環保勁敵，輸畀有「綠色建築師」之稱嘅環境局局長黃錦星（KS），皆因KS除咗廿年來喺屋企食飯一粒米都冇剩，達至「桌上零廚餘」外，就連湯渣都例必清乾淨晒，唔怪得佢笑言屋企煲咩湯都要經佢首肯，揀啱佢口味先准煲喇！
黃錦星叫惜食積福
臨近農曆新年，KS預祝大家豐衣足食之餘，更提醒大家「年年有餘」嘅諗法係時候轉一轉，唔一定有嘢剩先係好事，齊齊惜食積福至係王道。KS發表完慳家言論，臨落台前更飲晒杯水先走，果然唔係得個講字，就連到黑英上台發言都唔敢飲水，驚KS要佢「乾杯」喎！