政情：外援助陣延續不敗 立會狂數大狀隊
小西灣草地足球場尋日上演一場立法機關對司法機構大戰，立法會足球隊最終以五比二大勝大律師公會，奪得獎盃，延續十六場不敗紀錄。立法會足球隊過往一直靠外援入波食胡，尋日都唔例外，前足球先生丘建威同李健和等外援一共入咗三球，而議員梁志祥同郭偉強就各入一球，總算有個交代，唔使被人話立法會隊勝之不武。
另一議員范國威踢咗十分鐘唔夠就因為要趕下場而換衫走人，馬逢國過咗一陣都話頂唔順要坐低休息，仲話要贏多七球先會再落場，費事連累大家喎。現場所見，負責「人盯人」嘅胡志偉就跑得最快兼唔喘氣，而梁志祥嘅腳法就最耍家。梁志祥話，佢後生時對足球冇乜興趣，四十幾歲先至學踢波，當時每個星期都會同朋友踢番兩三場。
蔣麗芸（Ann）同郭榮鏗都有撐場做啦啦隊，阿Ann仲好似超級粉絲咁對搓緊波嘅梁志祥大叫加油，嚇窒隔籬嘅大狀隊員。有份落場嘅山度士大讚議員表現唔錯，仲話「業餘算係咁o架喇」。隊長陳克勤就話同山度士傾過，打算邀請對方閒時開啲雞精足球訓練班，等議員下次可以踢得好啲喎。