政情：遊粵大陣仗開路 貪曾阻街犯眾憎
「貪曾」前特首曾蔭權爵士在任期間貪盡海陸空，食盡省港澳，每次出遊都係勞師動眾，搞到神憎鬼厭，所以好多路過嘅市民都唔抵得影低佢啲衰嘢圖文並茂放上網。不過，最離譜嘅係貪曾卸任特首後，竟然仲繼續享受禮賓式特別待遇，前日又有人見佢同老婆去咗廣州玩，要內地有關部門出動到兩部警車幫佢開路，浪費人力物力之餘，仲妨礙內地市民日常生活。
話說上周三喺北京傳出貪曾個名唔喺全國政協名單上之後，貪曾隨即喺周四發表聲明，死撐話只係自己放棄參與全國政協嘅高層工作，但查實佢早已被中央放棄。大家咪以為貪曾會匿埋靜思己過，有網民就喺社交網站微博分享咗張相片，踢爆貪曾夫婦前日已在廣州遊玩，仲去咗廣州廣百百貨北京路店購買賀年應節物品。
一周去一次
聽聞貪曾今次去廣州又再動用到廣州市政府嘅資源，因為佢出入廣州嘅規格等於退休省部級官員待遇，所以除咗全程要人「傍住」之外，仲要兩架警車一前一後為其座駕及隨從車輛開路，一行就起碼有四架車，加上呢位爵士最近幾乎每星期都去廣東省一次，相關部門每次都要派人手去接待佢，惹來怨聲載道，埋怨未試過有地方前官員好似貪曾咁去得咁密，貪曾確係犯眾憎。