政情：陳仲尼赤子心不變
三十六名港區全國人大代表喺去年底誕生，還記得當時身兼考試及評核局（考評局）主席嘅全國青年聯會副主席陳仲尼（Rock），因為教育界擔心考評局「被染紅」，最後關頭決定棄選人大。殊不知事隔一個多月，阿Rock轉過頭竟然循全國青聯界別，獲委任同樣「紅色」十足嘅全國政協委員，認真「換湯不換藥」，據聞教育界又醞釀新一輪窮追猛打行動，睇怕阿Rock又有排煩喇！
去年底傳出阿Rock有意參選人大後，惹來教育界好大反彈，事關本身係考評局主席嘅阿Rock，負責睇住全港考試制度，當時教協副會長黃克廉等十名教育界選委就產生「赤的疑惑」，要求阿Rock選人大就要先辭去考評局主席一職，又揚言如果主席變成人大，擔心會有角色衝突，甚至影響考評局政治中立及獨立形象，唔知阿Rock係咪怕麻煩，最後一刻決定棄選人大。
不過，考評局「被染紅」嘅質疑平息咗只有一個多月，原來阿Rock始終冇放棄「一路向北」志向，事關尋日公布新一屆全國政協委員名單中，竟然喺全國青聯界別中見到阿Rock個名，難道阿Rock當時唔選只係緩兵之計，一心疊埋心水等政協委任？
教育界要求辭職
雖然阿Rock呢個政協委任米已成炊，但擔心考評局「被染紅」嘅人點會咁易放過佢吖，據聞部分教育界人士聽到呢個消息後都好慶，其中教協理事韓連山話，阿Rock依家做咗政協已經歸邊，唔再客觀中立，已經唔適合做考評局主席，要求佢盡快辭職，又會同業界商討有乜進一步行動，睇怕阿rock都係諗定到時有乜招數拆彈喇。
方文雄同樣獲委
同樣唔選人大轉過頭獲委任做全國政協嘅仲有中華總商會副會長方文雄（David），但有人就為David講好說話，話David其實喺人大報名前約一個月已經宣布棄選，加上David又冇乜惹火嘅公職委任，所以佢突然獲委任做政協，可能只係時間上巧合，真係信不信就由你喇！