中環出更：林鄭熱上加熱滴晒汗
香港青年協會尋日喺天水圍擺咗一百圍盆菜宴益街坊，政務司司長林鄭月娥同教育局局長吳克儉應邀出席做嘉賓。不過，喺陽光普照加上氣溫高達廿七度下，着咗成套黑色唐裝加樽領衫嘅林鄭都流晒汗，佢話估唔到農曆十二月會係咁嘅天氣，仲要係食盆菜添，熱上加熱，難怪佢話肯定自己着錯衫。不過，作為男士嘅吳克儉就方便得多，佢即時除低件西裝褸，戴埋鴨嘴帽防曬。
吳克儉好食得
雖然咁熱又對住熱辣辣嘅盆菜，但吳克儉依然好好胃口，佢仲風騷同街坊講，教育第一件事係「民以食為天」，而佢就喺十分鐘內已經食咗盆菜入面十七款食物，真係擦得。卓妮諗住睇吓佢係咪真係咁快手啦，點知佢真係密密食，連林鄭為台上智障人士表演打氣時，吳克儉都唔捨得擺低筷子同個碗，究竟係盆菜真係咁好味，定係佢未食早餐呢？唔知工作又會唔會咁快手呢？
卓妮