中環出更：鄉議局盃賽發叔失威
鄉議局盃賽尋日又喺沙田馬場舉行，鄉議局除咗包廂房邀請各鄉紳聯誼外，仲搞咗個有獎競猜遊戲，叫嘉賓投票估吓邊匹馬會贏到盃賽，三名得獎者可瓜分一萬元獎金。發叔作為主人家，而且名下愛駒「驪龍」又有份參加盃賽，所以大部分鄉紳都主動支持發叔愛駒，可惜「驪龍」最終三甲不入，真係跌到一地眼鏡碎。
話說鄉議局盃賽開跑前，各鄉紳立刻動身走到廂房外露台觀賽，眼見「驪龍」由開跑一直只係墮後，最後跑第七收場，但啲鄉紳都話唔緊要，最重要係大家玩得開心喎。
劉業強「驌龍」跑包尾
其實尋日發叔個仔劉業強夫婦名下愛駒「驌龍」都喺第九場出賽，但成績仲慘淡，跑包尾，有人笑言，劉業強做咗政協委員，乜都賺番晒啦！問發叔係咪將自己個政協位傳畀個仔，佢o依o依哦哦話唔係。
卓妮同場又見到恒生銀行前女大班梁高美懿同丈夫梁承達入場，梁太真係鴻運當頭，啱啱做咗政協，而佢老公有份嘅團體馬「皇仁勁駒」又跑出，齊齊落場拉頭馬。梁太話，呢匹馬剛開始跑泥地，所以信心唔大，依家贏咗真係好驚喜。另外信和置業主席黃志祥就代女兒黃敏華入場拉頭馬，但佢一直冇發覺有記者喺門外等佢影相，最後佢表現得有啲唔好意思咁行出來影相滿足大家，真順得人。
卓妮