內地各省市呢幾日已公布最新嘅省市政協名單，發現省市政協有變成富二代俱樂部嘅趨勢，事關不少富二代都散落到各省市做政協，當中又以北京市同天津市政協係大戶，究竟有幾多人真係有心做好建言獻策工作，相信佢哋自己心中有數。
新一屆全國政協委員日內公布，政商界爭崩頭想分一杯羹，暗中部署子女提早「升呢」，即使因為各種原因而暫時未能如願的人，都着力爭取有關方面委任為省市政協。
據聞除咗兵家必爭嘅北京市政協外，近年天津已成為名人之後嘅新天堂，至少有三名名人之後，包括港協暨奧委會會長霍震霆之子霍啟剛、新世界發展主席鄭家純之子鄭志剛、莊士集團太子爺莊家彬等，最近都獲委任落戶做天津市政協。
至於北京市政協，富二代同名人之後更係不計其數，地產界有「四叔」恒基地產主席李兆基兒子李家誠、信和置業主席黃志祥兒子黃永光，另外立法會內務委員會主席梁君彥嘅兒子梁宏正等，究竟一眾富二代係有名有實定係有名無實，大家真係要金睛火眼（目及）實喇。