政情：貝鈞奇嘆港足運發展難
農曆新年將至，作為本地球壇盛事嘅賀歲盃如常舉行，但就冇外國勁旅來港參賽。香港足球總會董事貝鈞奇日前出席活動時慨嘆，積弱已久嘅香港足球運動唔單止難以吸引優秀球員，就連邀請外隊來港較量亦唔容易。佢話，邀請外國勁旅來港，單係戲金就動輒索價數百萬美元，憑票房收入根本難以填補，加上欠缺「大水喉」支持下，實在難以借助與外隊較量來提升本地足球水平。
港企乏贊助意欲
貝鈞奇又話，本地足球賽事欠吸引力導致票房收入欠佳，令球會無法向球員提供優厚待遇難以招攬人才。目前球員嘅月薪只得約一萬多元，跟九十年代球員可以月入四萬元比較真係天與地，所以少人投身足球事業係可以理解嘅。佢慨嘆，日本大企業願意慷慨贊助當地球隊，令到日本足球實力茁壯成長，但香港就欠缺呢種文化，單靠球會艱苦經營好難突破困局。雖然政府曾提出鳳凰計劃以振興足運，但可惜目標過於理想，跟現實存有落差。