「貪曾」前特首曾蔭權爵士在任期間貪盡海陸空，貪威識食，就連約會立法會各黨派議員都要去食好嘢，最廣為人知就係與沆瀣一氣嘅民主黨（白鴿黨）議員結伴去鯉魚門大擦貴價海鮮，又鮑魚又響螺湯，一味掛住風花雪月，飲飲食食嘅時間仲多過討論實事。不過，自特首梁振英（CY）上場後，一洗貪曾嘅貪食虛浮文化，多數約會議員到禮賓府食早餐交流，而且仲係食清淡早餐添。
尋日輪到白鴿黨五個議員上禮賓府食早餐，根據該黨單仲偕（（先刂）雞）所講，CY請佢哋食嘅早餐相當簡約，先有水果併盤，之後就有粟米肉碎粥、蝦米腸同油炸鬼，同前任貪曾約佢哋去鯉魚門歎海鮮相比，CY真係踏實又經濟。不過，對於食慣好嘢嘅白鴿黨議員就可能唔係好慣喇，咁咪當間中食清淡啲清理腸胃囉！
白鴿黨主席劉慧卿話，該黨主要同CY討論政改問題，之後大家都有就房屋問題及空置稅交換意見。卿姐仲喺早餐會上提出，如果CY想多啲同泛民主派合作，就應該喺制訂政策時多啲諮詢佢哋嘅意見喎。佢又問CY有冇講過同泛民主派係「敵我矛盾」嘅言論，CY聽到後都有笑住回應，但回應咗乜嘢，卿姐就叫大家問番CY喎。