政情：自由黨 經濟動力蟹鬥
施政報告提出劃一前兩個市政局遺留下嘅市區及新界文康市政設施服務收費，終於解決咗一個糾纏十二年嘅歷史問題。可惜呢邊廂解咗個死結，那邊廂就將自由黨同經濟動力嘅死結打得更實。自從部分自由黨員退黨自組經濟動力後，雙方長期處於備戰狀態，狗咬狗骨嘅場面屢見不鮮，尋日經濟動力就因為懷疑自由黨搶咗佢哋功勞而起晒弶，為一眾花生友提供不少娛樂。
話說施政報告前夕，一班經濟動力地區人士去食環署示威，不滿新界食肆牌照費貴過市區，要求政府劃一收費。結果施政報告真係宣布劃一收費，一班經濟動力嘅手足理應開香檳慶祝，但佢哋就因為自由黨飲食界議員張宇人喺立法會討論施政報告致謝議案中講咗一句「其實係我搞出嚟嘅！」以為張宇人搶功勞，因而雅興盡失，佢仲四出叫人幫手討公道。
食肆牌費死結獲解決
不過，聽真啲張宇人嘅發言，其實佢係表現出謝罪咁款，話市區同新界食肆牌照收費不一，其實係佢搞出嚟嘅！事關佢當年做臨時市政局議員時，因應經濟不景氣，曾經提出減食肆牌照費嘅建議，最終獲得通過，但結果就造成市區同新界牌照費不一嘅情況。佢又話，之後亦有喺立法會提出要求政府劃一收費，可惜政府未有採納，今屆政府決定劃一收費，值得讚，佢亦好開心。
張宇人一邊認錯，一邊又表明自己有補救贖罪，究竟係真心謝罪，抑或係曲線抽水，真係各有解讀。不過，對於經濟動力手足嚟講，張宇人認錯可能比阿婆走得快更加有古怪，而佢一切贖罪表現亦都只係抽水伎倆，而張宇人豪言一句「我搞出嚟嘅！」更加輕易觸動經濟動力嘅神經，覺得張宇人喺度邀功「成功爭取」，擺明抽水。
謝罪 抽水 各說各話
經濟動力中人仲話，張宇人如果真心想幫業界，就應該堅持做到底，為業界爭取，而唔係事成之後先抽水一句「好開心」，仲話佢已經唔係第一次抽水云云。至於張宇人就回應話，抽水唔係佢性格，亦都唔知對方究竟嬲咩喎！聽完佢哋嘅對話，大家係咪覺得好有趣味呢？