中環出更：陳振邦囝囝 唔憂冇奶飲
莎莎國際太子女郭詩慧（Melody）與丈夫陳振邦（Davis）日前帶埋囝囝頌言（Jacob）齊現身公開活動，九個月大嘅Jacob，白雪雪、肥嘟嘟好可愛。近期水貨客問題困擾唔少市民，奶粉成為熱門搶手貨，新西蘭奶粉更加斷晒貨，唔少父母都驚寶貝仔女冇奶飲，紛紛四出撲奶粉。
Davis就好淡定話冇有怕，皆因佢囝囝飲嘅係美國奶粉，內地人唔係咁識買，所以貨源相對穩定。加上其公司現時代理多個牌子奶粉，想食邊隻都得啦！
已參加playgroup學英文
講到愛兒近況，兩夫婦即展現甜絲絲笑容，佢哋透露Jacob好為食，依家已經開始進食固體食物，佢哋不時會拍拖去超級市場買啲有機蔬菜、水果同肉類，炮製愛心營養餐。Davis笑言，Jacob好鍾意笑，性格活躍又貪玩，依家上緊playgroup，開始識得辨別monday至sunday、weather、season等英文，最鍾意指住花同燈，而且對閃卡特別敏感。問佢哋幾時為Jacob添個弟弟或妹妹？Davis就話順其自然喎。