中環出更：學神鄧家彪好緊張
送龍迎蛇，農曆新年將至，相信大家都會定下新春大計，卓妮就八到工聯會立法會勞工界議員鄧家彪（Bill）想喺蛇年一次過考到個私家車牌。據聞佢考車牌唔係因為升呢做立法會議員而要變有車階級，而係佢依家經常要穿梭東涌區議員辦事處同金鐘立法會，一程車要用上個幾鐘，為咗節省交通時間，先至同太太決心學車。日前卓妮收到風佢喺九龍灣一帶學車，於是就即時走去睇吓。
原來學神Bill依家跟緊工聯會駕車教師分會嘅教車師傅學車，當日佢先駛到九龍灣啟興道學三手軚窄路掉頭，慢車操控問題不大。不過，後來到祥業街一帶街道兜圈練習駕駛時，由於沿路有唔少工廠大型貨車穿插，學神Bill顯得有啲緊張，搞到教車師傅都緊張埋，即時伸隻手過去扶住學神Bill個軚盤，但整個過程都算順利，阿Bill仲話，學車後終於明白到點解做司機要一眼關七喇。
三月考路試
原來當日係阿Bill第二堂學車，因為平時除咗要長駐立法會外，仲要經常落地區工作，所以冇乜時間上堂，惟有每次上堂加碼到一個半小時。照阿Bill當日嘅學車表現嚟睇，三月考路試一次過合格都應該問題不大。其實佢之前考筆試都係一次過搞掂，聽聞佢當時開咗一晚夜車溫習筆試，熟讀香港交通條例，最後就攞滿分喇。不過，路試唔係紙上談兵，真係要一眼關七，總之預祝阿Bill可以一擊即中啦！
卓妮