一個人砰嘭一嘢跌咗落地，點樣先至可以保得住嚴重受損嘅尊嚴呢？不如睇睇過氣特首曾蔭權點樣親身示範啦。
呢嗱，就咁，最新一屆全國政協委員名單之中，曾蔭權爵士名落孫山。意思即係話，貪曾唔可能透過政協階梯出任全國政協副主席，唔可以好似另一位過氣特首董建華咁樣躋身國家領導人之列。擔當京官嘅春秋大夢幻滅，原因係乜嘢呢？畫公仔都唔使畫出腸啦，當然同貪曾喺特首任期結束之前冇耐，被東方報業集團獨家連環踢爆貪盡海陸空有關，全國政協唔想一個戴罪之身入局吖嘛。
換言之，貪曾樣衰衰跌咗落地，佢即刻施展一招獨家絕技「死鴨撐飯蓋」。洋名Donald所以又叫Donald Duck嘅貪曾發表聲明話喎，卸任行政長官職務之後，中央有關部門曾經詢問過，是否有意參與新一屆全國政協工作，鑑於廉政公署嘅有關調查，佢經過慎重考慮已經答覆現階段並不適合參與全國政協嘅高層工作。撐住飯蓋嘅死鴨仲話，期望有關調查結案後，可以有機會繼續貢獻國家同為香港服務。
跌咗落地，揦番拃沙，咪就係咁解囉。貪曾嘅意思即係話，唔係人哋大腳踢我出局，係我自己主動提出唔想入局之嘛，你吹得我脹！
當然啦，死鴨撐飯蓋唔一定撐得住o架，事關有人踢爆佢講大話，之前中央對於委任曾蔭權做全國政協委員仍然猶豫不決嘅時候，有人大代表威脅辭職，最後中央因為DBC數碼電台事件而下定決心將佢除名。講到呢度大家應該心知肚明，貪曾係徹頭徹尾自食惡果，由於自己嘅貪得無厭而搞到上大人棄之如敝屣，死鴨撐飯蓋失敗咗。
無論如何點都好啦，貪曾冇得做政協確係大快人心嘅一件事，平日壁壘分明嘅建制派同民主派一反常態，一致認同貪曾出局係好事。正如公民黨立法會議員話齋，曾蔭權係受到自己嘅貪腐行為影響，不獲委任政協不難理解：「如果佢都獲委任，中央真係不理港人感受。」
既然貪曾做國家領導人嘅美夢破碎，除咗小市民心理上順氣少少之外，其實仲有一個好處o架，就係廉政公署再無後顧之憂，唔使因為佢嘅國家領導人身份而投鼠忌器，可以大展拳腳為香港修補廉潔奉公嘅核心價值。你知啦，蔭權七年禍患無窮，唔係呢個貪腐就係嗰個違規，官場商界烏煙瘴氣不忍卒睹，假如廉署痛定思痛真係打老虎，將香港開埠以來最高級官員繩之以法，法治之區嘅金漆招牌先至有機會唔生銹咋！