如果要別人尊重自己就先要學懂由心而發咁尊重他人，不過呢樣看似簡單嘅事，其實都唔係人人做到。好似外號「阿牛」嘅富二代，早前喺一個選舉幫手助選時，就不知不覺咁暴露咗自己嘅真面目。
話說「阿牛」雖然出生富裕之家，但人前表現得非常有禮，落落大方，所以有好多前輩都好欣賞佢，如果加以栽培，相信必成大器。
不過，表面識得尊重人唔代表真心懂得「尊重」二字嘅道理，話說佢喺選舉初時都仲係表現得大方得體，但到選舉中段時，可能因為受到挫折就表現得方寸大亂，個人一亂，真面目就自然出晒嚟。話說佢有次同競選團隊嘅女同事爭拗過後，竟然話呢班女同事係「老女人」，雖然佢講嘅係事實，但「老」字對老人嚟講最棹忌，難怪激到班女同事紮紮跳。
其實每個人都會有老嘅一日，又何必講到咁盡呢？更何況若要成為出色嘅人物更加需要謹言慎行，遇到小小挫敗就鬧人「老女人」真係唔要得，實在難成大器。
古語都有云啦，「寧得罪小人，莫得罪女人」，除非大家以後唔合作，否則都好難有好日子過，成日黑口黑臉對住你都夠死啦！