政情：廢腑之言：中英夾雜 都算本土文化？
公民黨立法會議員毛孟靜同新民主同盟范國威尋日宣布成立一個叫「香港本土」嘅關注組，聲稱捍衞本土文化，向大陸化同簡體字說不，但佢哋發嘅新聞稿就中英夾雜，話decent同sophisticated係香港人嘅本土文化元素。
毛孟靜話，中英夾雜都係香港特色之一，而呢兩個英文字相當難譯做中文，如果硬要翻譯可以譯成「分寸」同「圓熟」，但始終都係唔夠傳神。
其實佢同范國威對本土文化都好似有啲分歧，事關范國威講句成語都被佢話太過文皺皺唔夠本土，聽到佢哋兩個嘅對話真係得啖笑。