立法會尋日繼續辯論施政報告嘅致謝動議，唔少建制派議員都鬧爆「貪曾」前特首曾蔭權爵士在任時幾乎樣樣嘢都不思進取。
新民黨主席葉劉淑儀就批評貪曾政府處理房屋問題流於保守，好似隻驚弓之鳥咁事事驚餐飽，驚經濟泡沫爆破會影響樓市，所以就乜都唔做。不過，地產建造界議員石禮謙（大舊石）竟然「掩耳閉目」，力排眾議力撐貪曾。
大舊石暗寸其他議員為咗討好現屆政府，不惜搵啲嘢批評貪曾，之後仲發表豪情壯語為貪曾護航：「係咪所有曾特首做嘅嘢都係錯嘅呢？你哋今日係咁鬧，但之前又點解支持致謝動議呢？」佢之後繼續大讚貪曾任內功績，又寸其他議員咁樣批評係唔公道喎，莫非佢已忘記晒貪曾任內貪盡海陸空嘅醜聞？依家貪曾仲被廉政公署調查緊！
難得尋日大舊石開口講中文，點知一開聲就撐貪曾，當堂令其他議員嚇咗一跳。之但係諗深一層，大舊石同貪曾分屬老友，而且當年貪曾死都唔肯起居屋紓緩房屋短缺問題，對地產界及樓價絕對有利，咁就知道點解大舊石直至今日都仲要幫貪曾講好說話喇。