政情：蔡冠深大仔做省政協？ 或成最年輕委員
剛卸任中華總商會會長嘅政協委員蔡冠深，早前一度傳佢好大機會進身政協常委之列，但近日又傳冇佢份，同時又傳出另外兩個常委人選。不過，有人就話呢兩位人士都只係以內地嘅名額當上政協常委，與港區全國政協無關，所以傳來傳去都唔知邊個至真，最後結果係點可能真係要有關單位正式公布先作準。
被派瀋陽分公司磨練
不過，正喺傳出蔡冠深冇緣做政協常委嘅同時，政界就流傳話香港出咗一位差少少係九十後嘅遼寧省政協委員，成為香港最年輕嘅省市級委員，佢就係蔡冠深嘅大仔蔡雋思（Johnson）喇。話說Johnson喺加拿大畢業返港後，去年就被特派到家族位於瀋陽嘅分公司，負責聯絡唔同部門嘅工作，為接掌家族生意做好準備。雖然Johnson係八十後青年人，但執掌家族分公司嘅業務，被委派為省政協委員都唔係冇原因嘅。