政情：廈門將誕工展小姐 唔再係香港專利
以後工展小姐唔再係香港專利，事關中華廠商聯合會四月底喺福建廈門舉辦嘅工展會，將會有當地首位工展小姐誕生，唔知咁樣發展落去，工展小姐選舉遲啲會唔會變成世界或環球小姐選舉咁大規模呢？
廠商會尋日為今屆香港工展會搞慶功，身兼廠商會展覽服務有限公司主席嘅副會長吳永嘉（Jimmy）話，今屆維園工展會總銷售額再打破上年六億元嘅紀錄，仲再升一成半至七億元添。而緊接香港工展會嘅，係嚟緊四月底喺廈門國際會展中心舉辦一個設有二百七十個攤位嘅福建廈門工展會。佢仲透露屆時會選出首屆廈門工展小姐添。
選舉模式冇年齡限制
不過，Jimmy話廈門工展小姐同香港工展小姐嘅選舉模式唔同，參選者毋須由參展商推薦，亦冇年齡限制，即係全個廈門嘅女士都可以參加，認真有噱頭，相信到時一定好熱鬧。其實工展小姐喺香港已有近六十年歷史，贏得冠軍嘅工展小姐除咗成為公司嘅代表大使外，聽聞廠商會都設有一個好似慧妍雅集咁嘅團體，畀歷屆工展小姐聚埋一齊，所以做工展小姐都唔錯o架。