政情：立會請槍 延續不敗神話
今屆立法會新丁議員特別多，連帶足球隊都破天荒有十九人報名，當中唔少仲要係血氣方剛嘅後生仔。不過，為咗延續球隊嘅十三場不敗紀錄，新任隊長及領隊嘅民建聯陳克勤就一如既往搵定強勁嘅外援幫手，當中包括新界東甲組球隊和富大埔，另外亦搵咗李健和、山度士、馮嘉奇等足球猛將幫「腳」，雖然表面上球賽係冇得輸，但就予人有啲打茅波嘅感覺囉！
雖然立法會隊保持咗十三場不敗紀錄，但其實發水成分居多，皆因過往幾乎所有入球都係靠甲組外援球員射入，議員嘅入球真係冇乜。按照立法會規定，全隊十一人內只需要有六個議員，就可以用立法會名義出戰，所以外援可佔近半數。由於前隊長林大輝做過愉園及流浪班主，加上前領隊譚偉豪身兼傑志會長，當時搵甲組球員幫手根本冇難度，所以先會贏足咁多場。
不過，由於譚偉豪競逐連任議員失敗，加上大輝又唔做隊長，所以改由克勤做晒兩個職位。正當大家以為今屆球隊未必可以重拾昔日光輝時，克勤就透露會搵和富大埔足球隊幫手做外援，而且仲會搵多幾位足球猛將幫手，除咗李健和、山度士、馮嘉奇外，仲有前足球先生丘建威。另外，克勤嘅黨友梁志祥亦會喺元朗區搵啲足球猛人幫「腳」。
約戰大律師公會唔衰得
立法會足球隊聽日會喺小西灣運動場舉行今屆第一場友誼賽，對手係實力強勁嘅大律師公會，有唔少議員都報咗名參加，包括社民連梁國雄、漁農界何俊賢、工聯會郭偉強、白鴿黨胡志偉等。而梁志祥就會請多啲人去球場打氣，當中梗係唔少得喺議會內有「音波功」本領嘅蔣麗芸啦，有佢做啦啦隊吶喊助威，真係嚇窒啲大狀o架。
雖然過去駐港領事隊同政府隊都曾經係立法會隊嘅手下敗將，但克勤話，大律師公會實力都有番咁上下，而且仲密密練兵，誓要喺球場贏立法會一仗咁話，所以立法會隊絕對不容有失。其實克勤又使乜擔心吖，最終咪又係靠外援入波之嘛！