政情：中環出更：楊華勇弄瓦 親手剪臍帶
去年做老襯嘅菁英會主席楊華勇（Johnny），眨吓眼就榮升做爸爸，佢太太莊菲娜（Fiona）喺大前晚開刀誕下六磅重B女國盈，及時趕搭龍B尾班車，真係恭喜晒！Johnny初為人父，笑到見牙唔見眼，佢大爆喺太太生產期間，一直都陪伴在側，親眼見證囡囡出世，仲親手剪臍帶添，難忘一刻既緊張又興奮。
家有喜事，Johnny好雀躍咁公告天下，仲將一家三口嘅溫馨合照畀卓妮先睹為快。相入面嘅國盈眉清目秀，頭髮濃密，個鼻同嘴仔都似足爸爸。不過，Johnny就笑晒口話，覺得B女似媽媽多啲，都係天生一副美人胚子喎。
爺爺為改名絞腦汁
佢透露，國盈呢個名係由爸爸楊孫西喺上北京開政協會議之前改嘅，絞盡腦汁左度右度，最終決定取名國盈，諗好之後仲特意留低咗張字條通知佢。
「國盈」呢個名咁特別，究竟有乜嘢意思呢？Johnny就解釋，「國」字係跟族譜，而「盈」既有儀態優美、盈水清澈之意，亦代表做生意嘅帳目常有盈餘喎，認真有意思。