政情：活字印刷機終有好歸宿
近年港人保育意識高漲，好多古舊嘅事物都話要保留。早前因一齣得獎電影，令上環永利街成為保育焦點，當中一間印刷公司嘅古董級印刷工具，經本地藝術家又一山人（黃炳培）穿針引線下，近日移送到柴灣青年廣場作永久性展覽，期望幫助喺數碼時代中成長嘅年輕一輩，了解印刷技術嘅演進，從而令佢哋有所啟發。
又一山人搞展覽，加上一批具歷史價值嘅印刷工具，吸引多位藝術家及名人捧場，當中包括著名設計師靳埭強，仲有民政事務局常秘楊立門。又一山人話，在場嘅展品都係活字印刷工具，亦係世上最古老嘅印刷技術之一，活字印刷要逐個字粒嚟執，確係「粒粒皆辛苦」，既麻煩又欠效率，所以被淘汰實屬理所當然。
執字粒創作自家藝術品
今次展覽除咗畀觀眾一睹古舊嘅活字印刷工具，仲有機會執字粒上顏料創作自己嘅藝術作品。靳埭強認同今次嘅展覽好有教育意義，佢話五年前曾到外國考察，發現歐洲嘅美術院校，大多設有排字房，學生透過執字粒呢種咁原始嘅印刷技巧，強化佢哋嘅美術根基。反觀香港，能夠畀學生一試執字粒嘅學校，真係好少見嘞。
至於今次展品嘅物主、偉志印務公司創辦人李澤裕就話，今次展覽令佢悲喜交集，悲，係要告別陪伴佢多年嘅謀生工具；喜，係因為呢批印刷工具有個好歸宿。
佢話為咗安置呢批年代久遠嘅活字印刷工具，曾經聯絡多個政府機構但不得要領，如今能夠喺青年廣場永久擺放，令到年輕人知道印刷文化與傳統，實在係最好嘅結局。
卓妮