熊出沒中環 走訪律師行
【本報訊】被中央「搣柴」未能連任全國政協委員的劉夢熊，昨再出沒中環，期間曾到一間律師行逗留近一小時，但拒絕回應是否為身陷的多宗貪腐案件求援。他與不知名友人講電話時，更高呼「我游水落嚟，置生死於度外」。
劉夢熊昨早約九時返抵位於皇后大道中的東方明珠石油辦公室，至下午近一時才獨自離開，期間邊行邊大聲講電話，表現激動地說：「造謠生事，好惡毒，都冇任何證據，我批評『港獨』寫得最多，係乘機陷害，我真金不怕洪爐火。」「我喺論壇同專欄對『港獨』都毫不留情批評，態度鮮明，港澳辦都清楚，打過電話畀我，話我做得非常之好。」「我本身游水落嚟，置生死於度外，福禍算咩，兄弟，放心啦你！」
連任失敗 強顏稱「冇失望」
記者等到劉夢熊終於將電話掛掉後，問他與誰對話，他拒絕透露，問及未能連任政協有否失望，他則故作輕鬆地說「冇失望」。
劉夢熊其後到了置地廣場告羅士打大廈內一間律師行，逗留近一小時才離開。記者連番追問他：「告CY（特首梁振英）定叫律師辯護？律師有冇話成數高唔高？係唔係話成數低？驚唔驚入罪？擔唔擔心官司？」劉不耐煩地說：「依家未有機構起訴我，啱唔啱？未有被檢控，講咩勝數？都未進入法律程序，我哋見朋友好多嘢傾。」劉返回東方明珠辦公室前向記者重申自己無被檢控，見律師是討論「第二啲嘢」。