全國政協委員劉夢熊喺《陽光時務週刊》（下簡稱「週刊」）大爆特首梁振英（CY）上位內幕之後，「週刊」嘅創辦人陳平被起底係東方明珠石油董事，亦即係劉夢熊嘅生意拍檔，但陳平又暗示訪問前唔知劉夢熊爆料，事件都幾耐人尋味。不過，最近「週刊」就主動聯絡「倒梁」旗幟鮮明嘅公民黨（公文袋），話要喺維園年宵合作，公文袋每賣一對「人人落力踩CY」拖鞋，就隨拖鞋附送一本舊嘅「週刊」，莫非佢哋想聯手「倒梁」？
「週刊」報道劉夢熊專訪力數CY之後，再同公文袋合作賣拖鞋「踩」多CY一腳。不過，原來今次合作係由「週刊」做主動，話說「週刊」好欣賞公文袋為年宵設計嘅「踩CY」拖鞋，於是佢哋銷售部就打電話去有訂開「週刊」嘅公文袋嘅人跟進訂閱情況，順便傾埋合作玩crossover。除咗公文袋賣一對拖鞋，佢哋送一本舊「週刊」外，亦會將嚟緊兩期嘅「週刊」擺喺公文袋攤檔度銷售。
不過，公文袋嘅「踩CY」拖鞋只有二千對左右，所以如果「週刊」想清倉底貨都係清得二千本，但「週刊」喺訪問劉夢熊前有幾多倉底貨咁就唔知喇。