政情：張華峰睇好樓股繼續升
縱橫金融界幾十年嘅立法會金融服務界議員張華峰，見證無數大小股海風浪，佢預測今年市況走勢將會繼續強勁，無論係樓市定係股市都好難降溫。不過，張華峰最近遇上煩惱，事關佢被誤會同金融界行家李愛平係兩夫婦，查實兩人只係相識多年嘅好朋友，早前兩人現身仁愛堂慈善晚宴，佢仲大讚李愛平係金融界大姐大添。至於張華峰同太太，就多年來都相當恩愛。
澄清同李愛平係好友
張華峰正因為有個靚老婆喺背後默默支持，先可以喺股壇同政壇全心拚搏，遇到咩風浪都可以迎刃而解。
不過，講起樓價，佢就認為好難搞，就算政府頻頻出招都冇用，事關現時人民幣不斷升值，港府推出嘅買家稅喺內地買家心中，根本唔係咩一回事，況且有唔少內地人來港買樓唔係為投資，而係為咗方便搞移民，所以佢估計最快要到一五年美國加息，樓市先至有機會下跌喎。
至於股市方面，張華峰話因為中國資金想喺香港搵出路，所以股市亦唔愁，今年升勢唔會有太大阻力，睇好後市應該有排升。不過，佢話要股樓齊升，最緊要都係政府施政要保持運作暢順，政黨減少政治爭拗，否則大好商機都會因此而流走。