中環出更：連戰夫婦來港 低調血拼
好多外國政界猛人都鍾意來港旅遊同購物，最廣為人知就係泰國前總理他信夫婦，但原來台灣國民黨榮譽主席連戰同夫人連方瑀都鍾意來港「血拼」。卓妮上周五喺中環置地廣場一個商場見到連戰夫婦十指緊扣咁行街，睇完手袋又睇鞋，唔夠十分鐘已經買到心頭好，同行仲有兩男兩女。
台灣中國小姐冠軍出身嘅連夫人出咗名鍾意扮靚，當日佢哋一行人入咗一間巴黎品牌嘅名店，佢哋又睇鞋、又睇手袋，喺店舖逗留咗十分鐘左右就已經帶住戰利品離開。佢哋離開時，連戰仲拖到連夫人隻手實一實，真係恩愛。不過，連戰嚟香港點解冇人接待呢？
台駐港機構冇收通知
據聞台灣嘅駐港機構今次冇收到指示要接待連戰夫婦，如果連戰來香港公幹嘅話，通常都會通知佢哋安排接待，但今次佢哋就冇收到通知，睇嚟佢哋今次可能係「微服出巡」來香港掃貨都未定。
不過，據聞連戰嘅兒子連勝文喺香港都有啲生意，所以連戰夫婦話唔定今次嚟探兒子，順便買定啲靚衫返台灣過新年。