中環出更：陳細潔做美女廚神
「鯊魚女」保良局副主席陳細潔（Abbie）識飲識食，依然保持到一副苗條身材，女士們羨慕到極。原來佢閒時愛親自下廚煮兩味，食得夠健康，人自然靚。我哋早前喺一間超級市場見到Abbie，見佢精心挑選各項新鮮食材，仲買咗塊六百元嘅砧板，似係想煮餐盛宴咁喎。
當日Abbie忙裏偷閒，拖埋兩位女助手去行超市，卓妮見佢一入門口，就同助手一人推住一架購物車，浩浩蕩蕩出發，睇嚟要大量入貨咁款。皮膚滑過雞蛋嘅Abbie，深明均衡飲食嘅重要性，見佢一個箭步走到蔬果櫃前，買車厘茄、日本番薯，又轉身走到凍櫃前，細心揀選肥美嘅羊肉粒，之後仲掃埋隔籬櫃嘅芝士。
畀防霉砧板吸引住
行咗近一小時，Abbie推住一車美食，打算去收銀處畀錢嘅時候，突然被一塊價值六百元嘅砧板吸引住，拎上手研究一番。店員見佢咁好奇，即時熱心咁向佢介紹產品，最後Abbie決定帶埋砧板返屋企。卓妮上前同Abbie打招呼，問佢呢塊砧板有乜特別呢？原來呢塊砧板有防霉功能，仲有永久保養喎，唔怪得吸引到佢買啦。
Abbie話，自己平時工作好忙，所以一有時間就會約埋好友喺屋企開party輕鬆吓，當然會趁機會大展廚藝啦，唔知邊個咁有福氣，試到呢位靚女嘅手勢呢？佢笑言，其中一道拿手小菜係咖喱羊肉，見到朋友食得開心，佢都會跟住開心。
卓妮