探射燈：「荒」不擇食 試用裝奶粉餵B

近日，網上拍賣網站湧現多名奶粉賣家，出售的竟包括屬非賣品的試用裝奶粉。「全新BB美國雅培皇牌恩美力2號奶粉-31.2g，有30包」記者以買家身份向一名出售試用裝奶粉的賣家查詢，她承認試用裝來自診所，三十包一百八十元。

對方要求記者於午膳時間到藍田港鐵站交收，當日中午一時，一名年二十餘歲，OL打扮的女賣家出現，記者細看奶粉，發現包裝清楚印有試用裝非賣品等字樣，她為求記者買安心，即時表示：「我有朋友喺診所做，我同佢買番嚟轉售，奶粉質素同出面買嘅冇分別。」她續稱：「好多人同我買o架，仲有一批熟客長期訂貨，有剩貨先會放喺網上賣，呢批二號奶粉試用裝係最後一批，唔知幾時先返貨，不過仲有四百克罐裝試用裝，賣七十蚊一罐，太多人想買，我都諗住加到七十五蚊。」

賣家在拍賣網出售試用裝奶粉。	以OL打扮的女賣家（右）於港鐵站外交收奶粉。	試用裝奶粉的包裝上，清楚標示「試用裝非賣品」。

港爸反要北上購港貨

現時雅培皇牌恩美力二號奶粉，以消委會上月公布的市面價格，每罐九百克售價為二百六十元，而三十包試用裝，以每包三十二克計，合共九百六十克，售價一百八十元，較市價便宜三成半。

李太準備轉用同牌子的外國水貨奶粉，確保囝囝不會「斷奶」。	陳以誠提醒，家長購買來歷不明的試用裝奶粉沒有保障。	市民點睇 劉太（主婦）：「藥房依家都唔會賣畀香港人，有次去藥房買到一罐，想買多罐時，職員話要加多三十蚊，明劏港人，嬲到我即刻唔買。」

除試用裝奶粉亦被出售謀利外，亦有家長北上回購港版奶粉。居於上水的趙太，女兒每星期都要食一罐奶粉，家人為撲奶粉已絞盡腦汁，「上星期買唔到奶粉，老公要去深圳嘅港貨店買，食開奶粉喺港一百九十二元一罐，喺內地賣到成二百二十元人仔，計埋匯價貴港紙八十幾蚊，阿女唔可以冇奶食，點都要買。」

「遲啲準備轉食英國版嘅同牌子奶粉，大型奶粉牌子喺唔同地區都有生產線，喺樓上舖都可以搵到外國出產嘅水貨奶粉，始終同牌子，小朋友應該易啲適應，我哋爭唔過啲水貨客，惟有轉奶粉避咗佢哋。」居住北區的李太，對奶粉荒感受至深，她說，試過全家人見奶粉就買，儲定多些，但為求一勞永逸，已打算轉食同牌字的水貨奶粉。

醫生恐假貨危害健康

兒科醫生陳以誠認為，將試用裝奶粉轉售圖利是不道德行為。「試用裝奶粉係畀BB試食，點可以攞嚟賣；可能有診所員工，未經醫生批准，將試用裝奶粉攞去賣。」他又說：「如果奶粉係醫生畀幼兒試用，有咩事都可以找醫生負責，上網買來歷不明嘅奶粉，如果有咩事，冇人會負責。」

「試用裝奶粉係奶粉商經醫生送給BB試用，每間診所數量不多，唔知佢點搵咁多嚟賣。」家庭醫生關嘉美擔心奶粉有可能是假貨，危害幼兒健康。

執業大律師陸偉雄表示，只要試用裝奶粉以合法途徑所得，出售並無違法。不過，診所與奶粉商若有協議，試用裝只作推廣用途，屬非賣品，出售行為則有違協議，奶粉商有權收回奶粉。

就有人出售試用裝奶粉一事，雅培發言人未有回應會否採取法律行動，只稱試用裝奶粉派發給有興趣試用的消費者，以供試味。

抗奶粉荒招數

1.樓上舖購外國同牌子的水貨奶粉

2.加入奶粉商媽咪會訂貨

3.到深圳港貨店回購港版奶粉

4.見貨就買，儲貨以備不時之需

圖／文：專案組