政情：今日你上鏡：象哥唔錫身煙駁煙

吸煙有害健康，但進出口界立法會代表黃定光（象哥）就一於好少理，堅持做「飯後一支煙，快樂似神仙」嘅信徒。事關尋日下午兩點幾鐘午飯時間後，象哥喺立法會施施然行出嚟，一路行一路大力扯煙，好快已食完一支丟入垃圾桶。佢行過對面中信大廈門口時，又再點過另一支煙，後來企定定喺煙民「打邊爐」嘅熱點慢慢歎。咁啱中華總商會立法會代表廖長江路過，索性陪住象哥一齊煲煙，唔講唔知原來廖大狀都係煙民。象哥喺六、七分鐘之內狂煲兩、三支煙仔，睇嚟煙癮都唔細，見佢行返立法會時一臉滿足，就知佢叉足電喇！