政情：立會新服務有段古 手語兩派 爭做傳譯
立法會今個月起提供手語即時傳譯服務，方便聽障人士了解議會工作，但原來呢項服務推出嘅過程中曾爆發手語派系拉鋸戰。話說本港手語分為兩派，一派運用嘅手語比較簡單易明，用於日常溝通就最啱；另一派就比較複雜，通常用於傳譯法庭事務。立法會秘書處喺揀選派系提供服務時，旋即引起兩派拉鋸，兩方都爭住要立法會採用佢哋嘅手語派系。
吳文華學晒兩種
不過，秘書處後來發現，提供法庭派系手語傳譯服務嘅人手供應，比簡單手語更加充裕，加上立法會始終係立法嘅地方，手語傳譯應該要精確啲，所以立法會最後決定咗委託聾人福利促進會，請人傳譯法庭派系嘅手語，服務聽障人士。
另一邊廂，前立法會秘書長吳文華（Pauline）為咗更了解手語傳譯呢項服務，早前專登報讀課程學咗兩堂手語。
咁Pauline又學咗邊種派系嘅手語呢？佢就話兩種都有學，其實佢嘅目的係去了解唔同語系嘅異同，並唔係真正去學手語，所以佢學咗嘅手語，都已經還番晒畀手語老師喇。