中環出更：方潤華有獨門養生秘笈
卓妮每次見到年近九十歲嘅協成行集團主席方潤華，都係精力充沛、健步如飛。尋日佢同孫仔方添輝一同出席公開活動時，透露自己除咗勤於游水同運動外，仲有一本獨門「秘笈」，就係佢親手編寫嘅《養生之道》喇。
袋定幾本贈有緣人
方潤華話，呢本秘笈係喺八九年面世，當年為咗紀念父母方樹泉伉儷而印製，而佢手上呢本已經係第三版喇。
養生有道嘅方潤華話，佢喺《養生之道》入面分享咗自己對保持健康嘅睇法同心得，記載咗唔少滋補健體嘅食療，以及修身、養性等等道理，希望大家睇完本秘笈後，善用入面各種養生方法，健康長壽。
方潤華話，依家每逢出街都會袋定幾本「秘笈」喺身，方便隨時派畀身邊嘅有緣人，粗略估計至今已經派咗十幾萬本喇，佢仲希望收到呢本書嘅人，睇完之後送畀親友、同事傳閱。佢笑言，如果大家喺中環一帶見到佢，不妨主動問佢攞番本嚟睇吓，交流吓養生之道喎。