香港中產階層冇乜福利，支出又多，經常叫苦連天，立法會尋日就辯論點樣幫助中產，但原來各位議員對中產嘅定義都好似唔係太相同。當中以建築、測量及都市規劃界議員謝偉銓對中產嘅定義最廣泛，仲愛心滿瀉，因為佢除咗關心中產市民苦況外，仲好關注「中產家禽」嘅苦況，如果唔係又點會先後兩次將「中產階層」講成「中產家禽」呢？咁關注家禽權益，佢呢啲咪叫有心肝囉，唔似得金融服務界議員張華峰咁，竟然將本身政團講錯成「民建聯」，全程幫人哋宣傳，最後仲要自己友澄清補鑊。
