民建聯（民記）將於今年四月換屆，由於原黨副主席劉江華加入政府做政制及內地事務局副局長，加上該黨最近新加一個副主席位，變相有兩個領導層空缺。我哋之前講過，曾加入政府嘅陳克勤基本上「升呢」冇乜懸念，反而另一個黨副主席位，坊間一直流傳多個版本，據聞民記領導層最近敲定黨秘書長彭長緯擔任，有分析話佢突圍而出原因係心無旁騖，可以專注於黨務唔會分心。
現年五十八歲、沙田區議會副主席彭長緯升呢在望，相信事前冇乜人會估到，事關佢做區議員已經好多年，就算喺民記都係幾年前先至攀上做黨秘書長。不過，有黨內中人分析，阿彭上位主因係「知足常樂」，因為黨內一直有聲音希望有人專責做好黨務，但奈何黨內年輕一輩都對各級選舉較有興趣，相反阿彭近年都未有爭住參選，如果下定決心做黨務，相信對該黨有百利而無一害。
不過，值得一提嘅係，陳克勤同彭長緯雙雙都係出身新界東，反而新界西就一個副主席代表都冇，其他區會否因此而不滿，相信好快就會浮面。