政情：黃錦星替高永文受靶
立法會議員謝偉俊（Paul）尋日喺立法會大會上，質詢政府有咩政策或措施防止問題食油流入市面，政府就派咗環境局局長黃錦星（KS）出席回應。主打環保嘅KS惟有攞住食物環境衞生署提供嘅資料照稿讀，以及不斷話會將意見轉達其他部門，結果梗係被議員鬧爆啦！問題食油呢個關乎食物安全嘅問題，理論上應該由食物及衞生局局長高永文回應會好啲嘅，今次真係難為KS要代高永文受靶喇。
應派食衞局官員出席
阿Paul話，「地溝油」令市民聞油色變，食肆生意受損，問當局有咩對策。被委派回應質詢嘅KS就照稿讀足九分鐘，但讀到超晒時都滿足唔到議員，仲要話食環署冇證據顯示本港有「地溝油」。阿Paul當堂發火問政府係咪派錯人到場，搞到原本想發問嘅飲食界議員張宇人都話唔想問，費事難為KS咁話。
立法會主席曾鈺成就話，議員提出公眾健康問題，食物及衞生局應該派官員出席回應，暗示政府派錯人。其實今次又唔可以怪晒政府嘅，皆因阿Paul條問題大部分都係問回收廢食油嘅政策同規管，政府可能見到「回收」二字好自然就推咗畀KS囉。