政情：普選聯決定進入「休眠期」
我哋早前寫過終極普選聯盟（普選聯）自覺自己個朵已經臭晒，有意自行摺埋或改番個新名，希望可以吸納之前唔肯入普選聯嘅泛民黨派加盟，一齊討論下一輪政改方案。尋日普選聯召開大會，最後決定進入「休眠期」，即係唔解散但暫時唔再運作，由將來成立嘅新平台接手有關工作。不過，社民連、人民力量及新民主同盟（新同盟）等激進泛民黨派，均對加入新平台有保留，要不同泛民黨派放下成見同私心一齊傾政改，真係難過登天。
新同盟借水客打入北區
講開新同盟，佢哋近日主打北區水貨客議題，新同盟立法會議員范國威（Gary）仲趁施政報告答問大會當住特首梁振英面，拉埋手推車扮演水貨客，抗議政府打擊水貨客不力。新同盟咁落力，原來係想藉住打擊水貨客，光復幾乎畀建制派全盤佔據嘅北區區議會。
Gary當選立法會議員後，新同盟就換咗四位新召集人，當中仲有三個係「八十後」。其中年僅廿四歲嘅鍾錦麟（Ben）話， 泛民主派喺今屆區議會新界北區輸到幾乎渣都冇，下屆選舉將會係一個大挑戰。Gary下月會喺北區開設議員辦事處，而佢哋嘅大埔區議員關永業、任啟邦亦會幫手喺北區做聯絡工作，希望可以幫新同盟開拓北區。