政情：宗極連環炮 轟《蘋果》貪曾
向來敢言嘅恒隆集團主席陳啟宗（Ronnie）尋日出席商界舉辦嘅施政報告午餐會後又再發炮，不點名批評《蘋果日報》報道指政府有意研究放寬或解除港島薄扶林同半山區嘅發展限制，其實係益咗本身喺薄扶林有土地嘅恒隆集團，佢話呢個講法甚有偏見同不負責任。Ronnie之後又暗批「貪曾」前特首曾蔭權爵士過去七、八年都冇賣地，搞到出現極度歪曲嘅香港房地產市場，佢認真係火氣十足。
Ronnie話，政府個個區域都會去研究，佢本身作為地產商，好多地方都可能會擁有土地，「咁啱嗰度我有幅土地，咁就話益咗一個地產商，呢個根本係非常不負責任嘅講法！」佢更舉一反三話，行政會議成員張震遠曾提過空置稅，報道又話恒隆有嘅單位貨尾比較多，反問呢個係咪政府針對恒隆嘅政策呢？至於有指近日恒隆才發售囤積單位，Ronnie大力反駁呢個講法係冇做功課，冇研究歷史，重申完全同空置稅無關。
新房策要時間生效
Ronnie之後又將炮頭瞄準貪曾。當被多次問及新政府房屋政策成效時，Ronnie暗批貪曾過去七、八年冇賣地係錯誤嘅政策，搞到香港嘅房地產市場極度歪曲，出現不正常情況。佢以中藥作為比喻，認為貪曾過去七年遺留下嘅問題需要時間去調理：「你有啲近火，睇得太短視不明智，淨係睇一至兩個月不明智，要睇多三個月、六個月，任何政策都要時間先有成效」，但佢話自己唔係神仙，只係估計隨着供應慢慢增加，樓價會平穩啲（moderate）。
咁佢又會否呼籲市民依家買樓或賣樓呢？Ronnie話，從來唔夠膽話幾時買樓同賣樓最好，話自己係專家嘅話，相信有一半係呃人喎，所以佢自己唔敢認係專家。唔知Ronnie一炮三響呻完後，條氣會否順番啲呢？