中環出更：胡炎松不捨電影夢 由出租水車到起片場
香港嘅電影片場已經買少見少，其中位於西貢嘅成豐片場正是啟德扶輪社副社長胡炎松（Anven）一手創辦，隨着港產片業務萎縮，佢近年就將旗下「電影夢工場」免費提供畀大專生做多媒體實習，幫下一代實現夢想。原來Anven嘅家族本身係做建築生意，而佢自己就喺十八年前無心插柳，由出租一架水車開始，慢慢發展到後來嘅片場事業，期間仲有唔少國際巨星都曾經喺佢片場留下足印。
話說十八年前，電影《再見七日情》需要製造雨水效果，Anven靈機一觸，將建築用嘅水車出租，後來不少片商向佢哋租水車，令生意愈做愈大。由於Anven家族多年前買下大幅西貢地皮，適逢九十年代香港電影業蓬勃發展，朋友建議佢將地皮開設片場。就是佔地四十幾萬呎的成豐片場，包括八個錄影廠，設備齊全，《倩女幽魂》、《黃飛鴻》、《英雄本色》、《雪狼湖》等電影及音樂特輯，都係出自此處。
以前拍樓盤 依家拍奶粉
接觸片場多，令Anven遇上唔少趣事。「好多夜景戲，你會發覺現場冇落雨，但地下係濕嘅，其實係刻意用水車噴濕地面，加強神秘氣氛。又例如拍爆破場面時四散嘅雜物，其實係水松木嚟嘅！」現時Anven將片場交由二哥胡炎光（Kindwind）夫婦悉心打理，而佢則專注於建築生意。
Kindwind話，隨住時代變遷，片場拍攝嘅性質大不同，以前拍好多樓盤廣告，依家就變咗奶粉廣告，每次廠內有十幾個BB爬來爬去，場面好搞笑。雖然片場塊地好值錢，但Anven堅持唔賣，為嘅係對影視業嘅一份情意結。
卓妮