政情：施麗珊童年為睡衣扭計
社區組織協會（SoCo）幹事施麗珊嘅工作，主要係關注新移民同基層兒童。雖然施麗珊自己都係一個新移民，但佢話其實自己都係做咗SoCo幹事之後，先真正明白點先真正幫到一班新移民兒童。佢話明白社會對新移民有分歧同矛盾，但大家都唔可以睇小呢啲社會氣氛對小朋友成長嘅影響，如果成日畀人叫做「蝗蟲」，對細路仔嘅傷害都幾大。
原來施麗珊喺十一歲時由福建嚟香港，佢話以前喺內地嘅生活，物質好少得到滿足。所以有年農曆新年，佢收到婆婆喺香港寄畀佢嘅睡衣，呢件睡衣不但令佢興奮咗大半日，貪靚嘅佢仲扭計要着件睡衣出街，仲因此同父母糾纏咗一輪。
施麗珊話內地除咗物質供應較少，內地同香港仲有好多唔同，所以佢初來香港時都用咗一段時間適應。初到香港，施麗珊因為唔識廣東話，上堂好少講嘢，搞到老師次次寫評語都話佢文靜；又曾經因為上堂時「太專心」同坐得「太直」，令同學話佢「扮好學生」，佢依家諗番轉頭，都有笑有淚o架。