政情：政府退守預算案
立法會施政報告致謝動議歷年來都係各黨派議員對施政報告支持與否嘅溫度計，現階段建制派同泛民主派各陣營立場壁壘分明，更預期喺泛民群起反對下，特首梁振英（CY）隨時獲得史上最多嘅反對票。據聞港府內部最近就致謝動議投票形勢「把脈」，得出結論係認為大勢已去，有意對致謝動議拉票工作「放軟手腳」，寧可集中精力做好下月底發表嘅財政預算案，然後重新贏取民心。
料獲史上最多票反對
立法會下周三會一連三日舉行施政報告致謝動議，據聞政府最近都評估過社會各界對施政報告嘅意見，支持同反對聲音都有，但大方向都認同要有長遠房屋規劃，亦唔可以郁啲就「派糖」，但奈何政治現實係新政府冇蜜月期，CY過去半年喺大宅僭建問題上被人窮追狂打，政府要爭取泛民支持根本係癡人說夢，所以有意喺拉票時「放軟手腳」，免得浪費政治能量。
客觀現實上，施政報告致謝動議根本無望通過，按照傳統由立法會內務委員會主席提出嘅致謝動議須經過分組點票，當泛民議員投下反對或棄權票，動議便會遭否決。其次係今年議員數目增至七十人，CY喺泛民群起反對下，獲得史上最多嘅廿七票反對幾乎無可避免。
另有親中人士形容，致謝動議近年已經有所變質，好似變成泛民掛「聖誕樹」嘅表態舞台，政府要獲得議員支持難免要有啲政治交易，與其依家同議員討價還價，不如留番啲彈藥等預算案時「箍票」，以免出現撥款不獲通過嘅憲制危機。
話時話，雖然施政報告致謝動議遭到否決幾乎已成定局，但唔代表新政府對議會訴求可以愛理不理，始終經過過去半年醞釀政策想法後，各個政策局喺未來半年將會走出台前「見真章」，究竟行政同立法未來嘅互動係咪「鋪鋪清」，抑或發展到「逢梁必反」嘅格局，咁就要睇吓CY下一步點行，以及做唔做得出成績喇。